ახალი ამბები

საფრანგეთისა და იტალიის თავდაცვის მინისტრები სებასტიან ლეკორნუ და გვიდო კროზეტო შეთანხმდნენ ერთობლივად დააფინანსონ საზენიტო-სარაკეტო სისტემებისთვის საბრძოლო მასალის წარმოება, რომელიც უკრაინას უნდა გადაეცეს. ამ ინფორმაციას 27 იანვარს l'Opinion ავრცელებს.

გამოცემის ცნობით, საუბარია 700-მდე საზენიტო რაკეტა Aster-30-ის შეძენაზე, რომლითაც SAMP-T არის აღჭურვილი. შეკვეთის ჯამური ღირებულება დაახლოებით €2 მილიარდია.

მინისტრები რომში 27 იანვარს შეხვდნენ, რათა კიევისთვის სამხედრო დახმარების გაგრძელებისა და ომის ეკონომიკის გასაძლიერებლად ერთობლივი ქმედებები განეხილათ.

"ჩვენ შევთანხმდით გავაგრძელოთ უკრაინის მხარდაჭერა, დავიცვათ ხმელთაშუა ზღვა ახალი საფრთხეებისგან და გავზარდოთ ჩვენი ერთობლივი წარმოების შესაძლებლობები, განსაკუთრებით საჰაერო თავდაცვის სფეროში", - განაცხადა ლეკორნუმ.

კონტექსტი

კომპლექსი SAMP-T შექმნილია მექანიზებული დანაყოფების საჰაერო თავდაცვისთვის, ასევე მნიშვნელოვანი სტაციონარული ობიექტების საჰაერო სამიზნეების მასიური შეტევისგან დაცვისთვის.

2022 წლის 30 ოქტომბერს გაზეთმა La Repubblica-მ დაწერა, რომ იტალია და საფრანგეთი ამ საზენიტო-სარაკეტო სისტემების უკრაინისთვის გადასაცემად ემზადებიან.

უკრაინის პრეზიდენტმა ვოლოდიმირ ზელენსკიმ იტალიასა და საფრანგეთს მოუწოდა, რაც შეიძლება მალე გაუგზავნონ უკრაინას SAMP-T.

"ჩვენ გვინდა, რომ ჩვენი ხალხი უცხოეთიდან სამშობლოში დაბრუნდეს, რათა მათმა შვილებმა ისწავლონ სკოლაში, უნივერსიტეტში და ა.შ. მაგრამ უსაფრთხოების გარეშე, საჰაერო თავდაცვის გარეშე, ჩვენ არ შეგვიძლია ამის უზრუნველყოფა. ძალიან ცოტა ქვეყანა აწარმოებს საჰაერო თავდაცვის კომპლექსებს. იტალია საფრანგეთთან და გერმანიასთან ერთად აწარმოებს SAMP-T-ის კომპლექსებს. და ჩვენ ისინი გვჭირდება." - თქვა მან.