ლიეტუვა გამოიძიებს, როგორ მიანიჭეს აბრამოვიჩის შვილებს ქვეყნის მოქალაქეობა
ლიეტუვის პრეზიდენტმა გიტანას ნაუსედამ გასცა ბრძანება გამოიძიონ რუსი ოლიგარქის, რომან აბრამოვიჩის შვილებისთვის ქვეყნის მოქალაქეობის მინიჭების პროცედურა და დაეხმარნენ თუ არა ისინი მამას ევროკავშირის სანქციების თავიდან აცილებაში.
ამის შესახებ LRT წერს.
"მოქალაქეობა მიენიჭათ მოქმედი კანონმდებლობის შესაბამისად. ჩვენ უნდა შევამოწმოთ რამდენად სწორად მოხდა ეს და ჩვენ უნდა შევაფასოთ, მონაწილეობდნენ თუ არა ეს კონკრეტული პირები, მაგალითად, რუსეთის წინააღმდეგ ევროკავშირის სანქციების გვერდის ავლაში", - განუცხადა ნაუსედამ ჟურნალისტებს.
მისი თქმით, თუ ეს დადასტურდა, საჭიროა "მოიძებნოს შესაძლებლობები ლიეტუვის კანონმდებლობის შესაბამისი ზომების მისაღებად."
ამასთან, მისი თქმით, კანონმდებლობაში ცვლილებების შეტანა ერთი შემთხვევის საპასუხოდ არ არის კანონის უზენაესობის ნიშანი და ასეთი საკანონმდებლო ინიციატივები არ უნდა გახდეს "მასობრივი პრაქტიკა."
გარდა ამისა, ლიეტუვის შინაგან საქმეთა მინისტრმა აგნე ბილოტაიტემ შექმნა კომისია, რომელიც შეაფასებს რა გარემოებებში მიიღეს აბრამოვიჩის შვილებმა ლიეტუვის მოქალაქეობა.
ხოლო მიგრაციის დეპარტამენტს დაევალა შეაფასოს ევროკავშირის სანქციებს დაქვემდებარებული პირებისა და ორგანიზაციების სია და შეამოწმოს, არიან თუ არა სანქცირებული პირების ოჯახის სხვა წევრები ლიეტუვის მოქალაქეები.
მანამდე ცნობილი გახდა, რომ აბრამოვიჩის ორმა შვილმა ლიეტუვის მოქალაქეობა რუსეთის მიერ უკრაინის წინააღმდეგ სრულმასშტაბიანი ომის დაწყებამდე მიიღო.
ინფორმაციის გავრცელების შემდეგ, ლიეტუვის შინაგან საქმეთა სამინისტრომ განაცხადა, რომ კანონმდებლობაში ცვლილებებს ამზადებს, რომელიც ეროვნული უსაფრთხოების გამოწვევებიდან გამომდინარე, ლიეტუვის მოქალაქეობის ჩამორთმევის საშუალებას მისცემს.
