ახალი ამბები

ნორვეგიამ მზადყოფნა გამოთქვა რუსეთთან საზღვარზე ერთადერთი გამშვები პუნქტის ოპერირება შეაჩეროს. 

ამის შესახებ სამეფოს პრემიერ-მინისტრმა იონას გარ სტიორემ ოთხშაბათს გამართულ პრესკონფერენციაზე განაცხადა.

ნორვეგიის მთავრობის მეთაურს ჰკითხეს, მიზანშეწონილი იქნება თუ არა ფინეთის მსგავსად, რუსეთთან საზღვრის ჩაკეტვა. 

"საჭიროების შემთხვევაში," - უპასუხა სტიორემ.

მან აღნიშნა, რომ ნორვეგია ფინეთსა და ესტონეთში ვითარებას ყურადღებით აკვირდება.

ფინეთის ხელისუფლებამ რუსეთი ქვეყანაში თავშესაფრის უკანონო მაძიებლების განზრახ გაგზავნაში დაადანაშაულა და საპასუხოდ 8-დან 7 სასაზღვრო გამშვები პუნქტის დახურვა გადაწყვიტა.

25 ნოემბრიდან, ფინეთ-რუსეთის საზღვარზე მხოლოდ ერთი გამშვები პუნქტი იმუშავებს.

ფინელმა მესაზღვრეებმა განაცხადეს, რომ ბოლო თვეების განმავლობაში უამრავი ადამიანი ცდილობდა ქვეყანაში საბუთების გარეშე შესვლას.