ორბანის თქმით, უკრაინა რუსეთთან ომს ვერ მოიგებს
.jpeg)
უნგრეთის პრემიერ-მინისტრმა ვიქტორ ორბანმა განაცხადა, რომ უკრაინის სამხედრო ძალისხმევა რუსეთის აგრესიის წინააღმდეგ ბრძოლაში განწირულია და მოკავშირეების შემდგომი დახმარება მხოლოდ ახალ მსხვერპლს გამოიწვევს. მისი გამოსვლა დოჰაში, კატარის ეკონომიკურ ფორუმზე Bloomberg-მა გამოაქვეყნა.
ორბანს მიაჩნია, რომ "საბრალო უკრაინელები" ვერ შეძლებენ რუსეთის სამხედრო გზით დამარცხებას.
"თუ შევხედავთ ციფრებს, დავაკვირდებით სიტუაციას, შევხედავთ იმ ფაქტს, რომ ნატო არ არის მზად ჯარის გაგზავნისთვის, აშკარა ხდება, რომ საბრალო უკრაინელები ვერ გაიმარჯვებენ ბრძოლის ველზე", - განაცხადა უნგრეთის პრემიერმა.
ორბანმა თქვა, რომ რუსეთის აგრესია უკრაინაში შეიძლება მხოლოდ მაშინ შეჩერდეს, "როცა რუსეთის ფედერაცია შეერთებულ შტატებთან შეთანხმებას დადებს." მან ხაზგასმით აღნიშნა, რომ იმედოვნებს, რომ დონალდ ტრამპი 2024 წლის საპრეზიდენტო არჩევნებში გაიმარჯვებს.
გარდა ამისა, ორბანმა აღიარა, რომ უნგრეთი, რუსული ინტერვენციის დაწყების შემდეგ, არ ეთანხმება ევროკავშირის პოლიტიკას უკრაინის მიმართ. მან მშვიდობის მიღწევის ერთადერთ გზად ცეცხლის შეწყვეტა და შემდგომი მოლაპარაკებები დაასახელა.
