ახალი ამბები

ვლადიმირ პუტინი რუსი სამხედროების დედებს შეხვდა, რომლის ფარგლებშიც უკრიანაში ომის მიმდინარეობასა და სამხედროების მდგომარეობაზე ისაუბრა. 

ცხადია რუსეთის პრეზიდენტთან შეხვედრაზე ვერ მოხვდნენ უფლებადამცველი ორგანიზაციების წარმომადგენლები, რომლებიც ქვეყანაში მობილიზაციის გამოცხადების შემდეგ სამხედროების მდგომარეობით უკმაყოფილებას გამოთქვამენ. 

მეტიც, შეხვედრა არ გადაიცემოდა პირდაპირ ეთერში - კრემლმა შეხვედრის ჩანაწერი გაავრცელა, უცნობია თუ როდის შედგა შეხვედრა. 

"ყველაფერი მოდის ოჯახიდან და ის, რომ თქვენმა ბიჭებმა, მათ უმრავლესობამ აირჩია ისეთი ბედი, რომელიც სამშობლოსთვის მსახურება, სამშობლოს დაცვაა ესეც ყოველგვარი ეჭვის გარეშე თქვენი მუშაობის შედეგია",- განაცხადა პუტინმა. 

რუსეთის პრეზიდენტის თქმით, ქვეყნის ხელმძღვანელობა გააკეთებს ყველაფერს, რომ დაღუპული სამხედროების დედებმა თავი არ იგრძნონ დავიწყებულად. 

გარდა ამისა, პუტინმა სამხედროების დედები გააფრთხილა, რომ არავის ენდონ განსაკუთრებით კი ინტერნეტში გავრცელებულ ინფორმაციას - "ცხოვრებით გაცილებით უფრო რთულია, ვიდრე ამას ეკრანებზე აჩვენებენ, განსაკუთრებით ინტერნეტში - იქ საერთოდ არაფრის ნდობა არ შეიძლება, სავსეა იქაურები ფეიქებით, ტყუილებით და საინფორმაციო შეტევებით".