ახალი ამბები

სამართალდამცავებმა ჩრდილოეთ საფრანგეთში 76 წლის მამაკაცი დააკავეს, რომელმაც სოციალურ ქსელში ულტრამემარჯვენე პოლიტიკოსის, მარინ ლე პენის მოსამართლეს დაემუქრა. ამ ინფორმაციას Le Figaro ავრცელებს.

State Of Play: დაკავებულმა მოქალაქემ X-ზე გამოაქვეყნა გილიოტინის ფოტო წარწერით: "აი ამას იმსახურებს ეს ბო*ი." პოსტში ის პარიზის სისხლის სამართლის სასამართლოს პრეზიდენტს ბენედიქტ დე პერტუის გულისხმობდა, რომელმაც ლე პენს განაჩენი გამოუტანა.

• საფრანგეთის პროკურატურის ცნობით, მამაკაცი "მოსამართლის ან ნაფიცი მსაჯულის მიმართ მკვლელობის ან საკუთრებისთვის ზიანის მიყენების მუქარისთვის" და "მოსამართლის ან ნაფიცი მსაჯულის სამსახურებრივი მოვალეობის შესრულებისას სიტყვით, წერილობით შეურაცხყოფისთვის" დააკავეს.

Big Picture: 31 მარტს, პარიზის სასამართლომ ლე პენი დამნაშვად ცნო ევროკავშირის სახსრების გაფლანგვაში, ევროპარლამენტში თანაშემწეების ფიქტიური დასაქმების საქმეზე. მას 2027 წლის არჩევნებში მონაწილეობა აეკრძალა და ეს ზომა დაუყოვნებლივ ამოქმედდა "დანაშაულის სიმძიმიდან გამომდინარე."

• საზოგადოებრივი აზრის კვლევებით, ლე პენი ახლა საფრანგეთის პრეზიდენტის პოსტზე ყველაზე პოპულარული კანდიდატია.
• ლე პენი ასევე 100 ათასი ევროთი დაჯარიმდა და ოთხი წლით თავისუფლების აღკვეთა მიესაჯა (ორი წელი პირობითი - რედ.). მოსამართლეებმა არ დაადგინეს, რომ სასჯელის ეს ზომები დაუყოვნებლივ ამოქმედდება, ამიტომ ისინი შეიძლება შეიცვალოს სააპელაციო სასამართლოს მიერ.
• პარიზის სააპელაციო სასამართლო ლე პენის საჩივარს 2026 წლის ზაფხულში განიხილავს. სააპელაციო სასამართლოში გამარჯვების შემთხვევაში, პოლიტიკოსი საპრეზიდენტო არჩევნებზე კენჭისყრას შეძლებს.

Context: ლე პენის განაჩენს ავტორიტარული სახელმწიფოების წარმომადგენლები და ულტრამემარჯვენე პოლიტიკოსები გამოეხმაურნენ.

• რუსეთმა დაგმო "დემოკრატიული ნორმების დარღვევას" პარიზის სასამართლოს გადაწყვეტილების შემდეგ. "მართლაც, სულ უფრო მეტი ევროპული დედაქალაქი არის დემოკრატიული ნორმების დარღვევის გზაზე," - განაცხადა კრემლის პრესსპიკერმა დიმიტრი პესკოვმა.
• "მე ვარ მარინი!" - დაწერა ვიქტორ ორბანმა და მარინ ლე პენს მხარი დაუჭირა.
• ამერიკელმა მილიარდერმა ილონ მასკმა განაცხადა, რომ ლე პენის განაჩენის უკან "რადიკალი მემარცხენეები" დგანან: "როდესაც რადიკალი მემარცხენეები ვერ იმარჯვებენ დემოკრატიული არჩევნებით, ისინი ბოროტად იყენებენ სამართლებრივ სისტემას ოპონენტების დასაპატიმრებლად. ეს მათი სტანდარტული ტაქტიკაა მთელ მსოფლიოში."