სანდუ: მოლდოვისთვის დსთ-ში კარგი არაფერი დარჩა, მთავარი პრობლემა რუსეთია
მოლდოვის პრეზიდენტი მაია სანდუ მხარს უჭერს ქვეყნის თანდათანობით გასვლას დამოუკიდებელ სახელმწიფოთა თანამეგობრობიდან და განმარტავს, რომ რუსეთი უგულებელყოფს კიშინიოვის ინტერესებს.
ამის შესახებ მან მოლდოვურ პროექტ NonFiction-თან ინტერვიუში თქვა, რომელიც შაბათს გამოქვეყნდა.
სანდუმ აღნიშნა, რომ მოლდოვა აღარასოდეს უმასპინძლებს დსთ-ს სამიტს. "სამწუხაროდ, იმან, რაც მოხდა მთელი ამ ხნის განმავლობაში, აჩვენა, რომ მოლდოვის რესპუბლიკისთვის ამ საზოგადოებაში კარგი არაფერი დარჩა", - თქვა მან.
მოლდოვის პრეზიდენტმა განაცხადა, რომ ქვეყანა მზად არის კარგი ურთიერთობები დაამყაროს სხვა ქვეყნებთან, მაგრამ პატივისცემის საფუძველზე.
"როდესაც არის მუდმივი ბლოკადა, ენერგეტიკული შანტაჟი, პროპაგანდა და როცა რუსეთი - იმიტომ რომ აქ ყველაზე დიდი პრობლემა რუსეთის ფედერაციაა - არ სცემს პატივს ჩვენი სახელმწიფოს სუვერენიტეტს, არჩევანს, მაშინ, რა თქმა უნდა, ჩვენ უნდა გამოვიდეთ და ყოველთვის ვიმოქმედოთ ჩვენი მოქალაქეების ინტერესების დასაცავად", - თქვა სანდუმ.
მოლდოვა ჯერ კიდევ დსთ-ს წევრია, მაგრამ აპრილში ქვეყანამ ზოგიერთი ხელშეკრულების დენონსაციის პროცესი დაიწყო.
თებერვალში პრემიერ-მინისტრობის მაშინდელმა კანდიდატმა და მოლდოვის მთავრობის ამჟამინდელმა მეთაურმა დორინ რეჩანმა პირობა დადო, რომ დსთ-ს ფარგლებში დადებული ხელშეკრულებების დენონსირებას დაიწყებს.
2022 წლის მარტში, ევროკავშირის წევრობისთვის განაცხადის შეტანის შემდეგ, პრეზიდენტმა მაია სანდუმ აღნიშნა, რომ ქვეყანა აირჩევს დსთ-ს გასვლის დროს, როდესაც მოლდოვა "საკმარის პროგრესს მიაღწევს ევროპულ გზაზე."
.jpeg)
