შმიგალი: უკრაინაში ზამთრისთვის საკმარისი გაზი არის
უკრაინაში გათბობის სეზონი ობიექტების ნახევარზე უკვე დაწყებულია. ამის შესახებ უკრაინის პრემიერ-მინისტრმა დენის შმიგალმა ფეისბუქზე 6 ნოემბერს განაცხადა.
"ქვეყანაში ობიექტების ნახევარი უკვე დაუკავშირდა გათბობას. გაზსაცავებში არის 14.5 მილიარდი მ³ გაზი, რაც საკმარისია ზამთრისთვის", - წერს ის.
უკრაინის პრემიერ-მინისტრმა აღნიშნა, რომ ხელისუფლება "ყველაფერს აკეთებს იმისათვის, რომ ზამთარში ყველა უკრაინელს ჰქონდეს სინათლე და სითბო".
"ენერგეტიკოსები 24/7 რეჟიმში განაგრძობენ სარემონტო სამუშაოებს სტაბილური ენერგომომარაგების აღსადგენად. უკრაინამ უკვე მიიღო 700 გენერატორი დონორებისგან და კიდევ 900 უახლოეს მომავალში გადმოგვეცემა. 12 ქვეყანა გვეხმარება საჭირო სარემონტო აღჭურვილობით," - განმარტა შმიგალმა.
მან აღნიშნა, რომ მიმდინარე გათბობის სეზონზე ტარიფები არ გაიზრდება და ხელისუფლება სუბსიდიებს გამოყოფს.
