ახალი ამბები

Iran International-ის მიერ მიღებული ცნობები მიუთითებს, რომ აშშ-ისრაელის იერიშების შედეგად, ირანის შეიარაღებული ძალებისა და უსაფრთხოების სტრუქტურების სულ მცირე 5 ათასი წევრი დაიღუპა, ხოლო 15 ათასზე მეტი დაიჭრა.

დეტალები: მსხვერპლის უდიდესი ნაწილი სარაკეტო და უპილოტო საფრენი აპარატების ქვედანაყოფებზე განხორციელებულ საჰაერო დარტყმებს უკავშირდება.

ყველაზე მძიმე დანაკარგები „ისლამური რევოლუციის გუშაგთა კორპუსმა“ (IRGC), „ბასიჯის“ ძალებმა და პოლიციის სპეცდანიშნულების რაზმებმა განიცადეს. შეიარაღებული ძალების დანაკარგების შესახებ ოფიციალური მონაცემები ამ დრომდე არ გამოქვეყნებულა.

არსებული ინფორმაციები: ხელისუფლება ცდილობს საზოგადოების ინფორმირებულობის შეზღუდვას საჯარო პანაშვიდებისა და დაკრძალვის ცერემონიების აკრძალვით. ვრცელდება ცნობები, რომ დაღუპულთა ოჯახებს გლოვის რიტუალების ვიწრო, კერძო წრეში ჩატარებას სთხოვენ.

• მსხვერპლის შესახებ მონაცემები ვრცელდება იმ ფონზე, როდესაც ირანის უსაფრთხოებისა და სამხედრო ძალების ნაწილში უკმაყოფილება, საბრძოლო სულისკვეთების დაქვეითება, ფინანსური კრიზისი და დეზერტირობა შეინიშნება.

• Iran International-ის მიერ მოპოვებული ინფორმაციით, პოლიციის სპეციალურმა დანაყოფებმა პარასკევს მიიღეს შეტყობინება ხელფასების გადახდის შეფერხების შესახებ.

• ეს ბოლო თვეების განმავლობაში დაგვიანების უკვე მესამე შემთხვევაა, რის საპასუხოდაც პერსონალის ნაწილმა პროსამთავრობო აქციებზე დასწრებაზე უარი თქვა.

• წყაროების თანახმად, ამან გავლენა მოახდინა ძალების მობილიზებაზე ზოგიერთ დიდ ქალაქში.

• გარდა ამისა, ვრცელდება ინფორმაცია, რომ პენსიონერებსა და არმიის ზოგიერთ თანამშრომელს ხელფასი ზედიზედ მეორე თვეა არ მიუღია.

• ზოგიერთი მაღალჩინოსანი მეთაური IRGC-ს ადანაშაულებს იმაში, რომ ის „ბანკ სეფაჰის“ (Bank Sepah) ფინანსურ კრიზისს პოლიციის დასასუსტებლად და სხვა ინსტიტუტების, განსაკუთრებით კი სასულიერო მმართველობასთან დაკავშირებული უწყებების გასაძლიერებლად იყენებს.

• „გუშაგთა კორპუსი“ კადრების დეფიციტის შევსებას თადარიგის სამხედროების რეზერვიდან გაწვევითა და პატიმრებისთვის ამნისტიის დაპირებით ცდილობს.

სულისკვეთება: სამხედრო-საჰაერო ძალებში საბრძოლო მზადყოფნა და მორალური მდგომარეობა დაბალია.

• მას შემდეგ, რაც გავრცელდა ინფორმაცია ისრაელის F-35-თან შეტაკებისას ირანული Yak-130-ის ჩამოგდების შესახებ, ბევრი პილოტი თავს არიდებს აშშ-ისა და ისრაელის წინააღმდეგ საბრძოლო მისიებში მონაწილეობას.

• ამავდროულად, პოლიციის რიგებში დეზერტირობა ხელისუფლებისთვის სერიოზულ გამოწვევად იქცა.

• ზოგიერთი წყაროს თანახმად, ერთ-ერთი ბაზა 350-მა თანამშრომელმა მიატოვა, ზოგ ქვედანაყოფში კი დეზერტირობისა და სამსახურში გამოუცხადებლობის მაჩვენებელი 90%-ს უახლოვდება.