ახალი ამბები

კარიბის ზღვის აუზში შეერთებული შტატების მზარდი სამხედრო კონცენტრაციისა და აქტივობის ფონზე ნიკოლას მადურო დახმარებას რუსეთს, ჩინეთს და ირანს სთხოვს. 

ვითარების არსი: ამის შესახებ ინფორმაციას საიდუმლო დოკუმენტაციაზე დაყრდნობით Washington Post ავრცელებს - გასულ დღეებში პენტაგონმა კარიბის აუზში კიდევ ერთი ავიამზიდი გადაისროლა. 

• დოკუმენტაციის მიხედვით მადურო პარტნიორებისგან რადარებს, საჰაერო თავდაცვის სისტემებს, თვითმფრინავებსა და რაკეტებს ითხოვს. 
  
  
• წყაროების ცნობით, მადურომ ვლადიმირ პუტინს და სი ძინფინგს შესაბამისი შინაარსის წერილები გაუგზავნა. 
  
  
• დოკუმენტების მიხედვით, ტრანსპორტის მინისტრი, რამონ ველასკესი აქტიურ მოლაპარაკებებს აწარმოებს თეირანთან დრონებისა და სხვა სამხედრო შეიარაღების მისაღებად. 

ჩაშლილად: სი ძინფინგისთვის გაგზავნილ წერილში მადურო ქვეყნებს შორის სამხედრო თანამშრომლობის გაღრმავების აუცილებლობაზე წერს და მიუთითებს, რომ ვაშინგტონის ქმედებები საფრთხეს უქმნის ჩინეთსაც, რადგანაც პეკინი და კარაკასი "ერთ იდეოლოგიას იზიარებენ."

• ჯერჯერობით უცნობია თუ როგორი იყო მოსკოვისა და პეკინის პასუხი, თუმცა გასულ დღეებში კარაკასის აეროპორტში სანქცირებული ИЛ-76 ტიპის სატვირთო თვითმფრინავი დაჯდა. 
  
  
• საყურადღებოა, რომ თვითმფრინავი 2023 წელს აშშ-მ კონტრაბანდული იარაღისა და დაქირავებული ჯარისკაცების გადაზიდვის მიზეზით დაასანქცირა. 
  
  
• გარდა ამისა, გასულ კვირას რუსეთის სახელმწიფო დუმამ ვენესუელასთან გაფორმებული სტრატეგიული ხელშეკრულების რატიფიცირებას დაუჭირა მხარი. 
  
  
• წყაროების ცნობით, პუტინისთვის განკუთვნილი წერილი ვენესუელის ტრანსპორტის მინისტრმა მოსკოვში ოქტომბრის შუა რიცხვებში ჩაიტანა და მადუროს თხოვნა თავის რუს კოლეგას გადასცა. 
  
  
• წერილში მადურო რუსეთისგან დამატებით საჰაერო თავდაცვის სისტემებისა და თვითმფრინავების გარდა ლოჯისტიკურ დახმარებასაც ითხოვს - საყურადღებოა, რომ მადუროს ახალი შეიარაღების მიღება როსტეხისგან 3-წლიანი განვადებით სურს. 
  
  
• ჯერჯერობით უცნობია თუ როგორი იყო რუსეთის მთავრობის რეაქცია პარტნიორის თხოვნაზე. 

სტრიქონებს შორის: კარიბის აუზში ამერიკის სამხედრო აქტივობის ზრდის ფონზე მოსკოვი მოზომილ რიტორიკას ინარჩუნებს - სერგეი ლავროვმა შექმნილი ვითარებით შეშფოთება გამოთქვა, ხოლო კრემლში განაცხადეს, რომ რუსეთი მხარს უჭერს ვენესუელის სუვერენიტეტს და ხაზი გაუსვეს, რომ უთანხმოებები საერთაშორისო სამართლის ფარგლებში უნდა გადაიჭრას. 

• კომენტატორების შეფასებით 2019 წლისგან განსხვავებით - როდესაც 100-მდე რუსი სამხედროს გამოჩენამ ადგილზე ძალთა ბალანსი შეცვალა და მადურო ხელისუფლებაში დატოვა - ამჟამად უკრაინის წინააღმდეგ ომით დაკავებული კრემლი კარაკასის მიმართ ნაკლებ ინტერესს იჩენს. 
  
  
• მიუხედავად ამისა, რუსეთს კარაკასში რამდენიმე მოცულობითი ინვესტიცია აქვს, მათ შორის უმნიშვნელოვანესია სანავთობო სექტორში მოქმედი შეთანხმებები, რომელთა მიხედვითაც 3 რუსულ კომპანიას ყოველდღიურად 100 ათასამდე ბარელი ნავთობის მოპოვების ლიცენზია აქვთ. 
  
  
• გარდა ამისა, რუსეთს აქვს პატაოსა და მეხილონესის გაზის საბადოების ათვისების ლიცენზია. 

დიდი სურათი: რუსეთსა და ვენესუელას შორის აქტიური ეკონომიკური და სამხედრო თანამშრომლობა ჰუგო ჩავეზის პრეზიდენტობის წლებში დაიწყო - წლების განმავლობაში ვენესუელა აქტიურად ყიდულობდა რუსულ შეიარაღებას, მათ შორის საბრძოლო თვითმფრინავებსაც. 

• შეთანხმებიდან 20 წლის შემდეგ, მიმდინარე წლის ზაფხულში ვენესუელაში ამუშავდა კალაშნიკოვის ტიპის ავტომატების საწარმო. 
• წყაროების ცნობით, რუსეთისგან მიღებული შეიარაღების დიდი ნაწილი არ ინახებოდა სათანადო პირობებში და არ არის ოპერაციული. 
  
  
• რაც შეეხება სტრატეგიული თანამშრომლობის ხელშეკრულებას, ის მხარეებს ომის შემთხვევაში ერთმანეთის დახმარებას არ ავალდებულებს. 
  
  
• კომენტატორები ვენესუელას მიმართ კრემლის კლებადი ინტერესის დასტურად იმ გარემოებას ასახელებენ, რომ გასულ წლებში რადიო დაზვერვის ცენტრალური პუნქტი კრემლმა ვენესუელადან ნიკარაგუაში გადაიტანა, სადაც ანტი-ამერიკელმა ლიდერმა, დანიელ ორტეგამ მმართველობა კიდევ უფრო გაიმყარა. 

დაეწიე ამბავს: კარიბის ზღვის აუზში შეერთებული შტატების სამხედრო კონცენტრაცია სექტემბრიდან მოყოლებული იზრდება, გასულ დღეებში დაჯგუფება ამერიკული ფლოტის ტექნოლოგიურად მოწინავე და ყველაზე ახალმა, ჯერალდ ფორდის ავიამზიდმა გააძლიერა. 

• თეთრ სახლში აცხადებენ, რომ მიზანი რეგიონში მოქმედი ნარკო-კარტელების განადგურებაა - გასულ კვირებში პენტაგონმა ათზე მეტი საჰაერო დარტყმა განახორციელა "ნარკო მოვაჭრეების გემებზე." 
  
  
• კომენტატორები მიუთითებენ, რომ უახლოეს დღეებში აშშ-მ შესაძლოა ვენესუელას ტერიტორიაზე წერტილოვანი საჰაერო დარტყმები განახორციელოს

კონტექსტი: რეჟიმის ცვლილება კარაკასში რუსეთის გეოპოლიტიკური ამბიციებისთვის სერიოზიული დარტყმა იქნება - მოსკოვმა შესაძლოა კიდევ ერთი მოკავშირე დაკარგოს. 

• ამან თავის მხრივ შესაძლოა უფრო დაასუსტოს მოსკოვის კიდევ უფრო დიდი ხნის მოკავშირე რეგიონში, კუბის რეჟიმი, რომლის სპეცსამსახურები აქტიურად მონაწილეობენ ვენესუელის შიდა საქმეებში. 

სიღრმისეულად: FT: ვენესუელის ირგვლივ სამხედრო კონცენტრაციის მიზანი მადუროს დამხობაა