ახალი ამბები

ამერიკის შეერთებულ შტატებს მოლოდინი აქვს, რომ უნგრეთის პარლამენტი შვედეთის NATO-ში გაწევრიანების გადაწყვეტილებას მომდევნო კვირებში დაამტკიცებს.

„შვედეთი უზარმაზარ შესაძლებლობებს ფლობს ალიანსის ყველა სფეროში. გასული კვირის ბოლოს თურქეთის პარლამენტმა შვედეთის ნატო-ში გაწევრიანება დაამტკიცა. ახლა პროცესის დასასრულებლად, უნგრეთს მოუწევს მოქმედება. მე ველოდები, რომ ეს მომდევნო კვირებში მოხდება, უნგრეთის საკანონმდებლო ორგანო მუშაობას განაახლებს“, - ენტონი ბლინკენი.

კონტექსტი

2022 წლის თებერვალში რუსეთის მიერ უკრაინაში სრულმასშტაბიანი შეჭრის შემდეგ, ფინეთმა და შვედეთმა სამხედრო ნეიტრალიტეტზე უარი განაცხადეს და ნატო-ს წევრობის შესახებ განაცხადი შეიტანეს.

იმისთვის, რომ შვედეთი ჩრდილოატლანტიკური ალიანსს შეუერთდეს, გაფართოების პროცესს ნატო-ს აბსოლუტურად ყველა წევრმა უნდა დაუჭიროს მხარი.

თურქეთის პრეზიდენტი, რეჯეფ თაიფ ერდოღანი შვედეთის ნატო-ში გაწევრიანების პროტოკოლზე ხელმოწერისგან თავს იკავებდა, რადგან სტოკჰოლმს თურქეთის მიერ ტერორისტებად გამოცხადებული ეთნიკური ქურთების მფარველობაში ადანაშაულებდა.

გარდა ამისა, ანკარას უკმაყოფილება ივნისში სტოკჰოლმის ცენტრში გამართულმა ანტი-თურქულმა და ანტი-ისლამურმა აქციებმა გამოიწვია, რომლის დროსაც დემონსტრანტებმა ყურანი დაწვეს. მიუხედავად ამისა, 23 ოქტომბერს თურქეთის პრეზიდენტმა შვედეთის ნატო-ში გაწევრიანების პროტოკოლს ხელი მოაწერა და რატიფიკაციისთვის პარლამენტს გაუგზავნა.

31 მარტს თურქეთის პარლამენტმა ფინეთის, შვედეთისგან დამოუკიდებლად, ნატო-ში გაწევრიანებას მხარი დაუჭირა, რის შედეგადაც ფინეთი ალიანსს 2023 წლის აპრილში შეუერთდა.

მიმდინარე წლის 23 იანვარს თურქეთის პარლამენტმა შვედეთის ჩრდილოატლანტიკურ ალიანსში გაწევრიანების შესახებ პროტოკოლის რატიფიცირება მოახდინა.

ამჟამად, ნატო-ს ერთადერთი წევრი სახელმწიფო, რომლის პარლამენტსაც შვედეთის ჩრდილოატლანტიკურ ალიანში გაწევრიანების საკითხის განხილვა ამ დრომდე არ დაუწყია, უნგრეთია.

2023 წლის სექტემბერში უნგრეთის პრემიერ-მინისტრმა, ვიქტორ ორბანმა განაცხადა, რომ მისი ქვეყანა შვედეთის ნატო-ში გაწევრიანების შესახებ განხილვის დაწყებას არ ჩქარობს, რადგან შვედეთის უსაფრთხოებას არაფერი ემუქრება, თუმცა 2024 წლის იანვარში ნატოს გენერალურ მდივანთან, იენს სტოლტენბერგთან სატელეფონო საუბრისას შვედეთის ჩრდილოატლანტიკურ ალიანში გაწევრიანებასთან დაკავშირებით მხარდაჭერა გამოხატა.