ახალი ამბები

დიდი ბრიტანეთის მთავრობამ ჰიდრავლიკური მოტეხილობით ფიქლის ბუნებრივი აირის წარმოებაზე მორატორიუმი, ქვეყნის "ენერგეტიკული უსაფრთხოების გაძლიერების მიზნით", გააუქმა. ინფორმაცია ბრიტანეთის მთავრობის ვებგვერდზე ხუთშაბათს, 22 სექტემბერს გამოქვეყნდა.  

დიდი ბრიტანეთის მთავრობამ ინგლისში ფიქლის გაზის მოპოვებაზე მორატორიუმი გააუქმა და კიდევ ერთხელ დაადასტურა თავისი მხარდაჭერა ნავთობისა და გაზის ახალი ლიცენზირების რაუნდისთვის. ხელისუფლება ელოდება 100-ზე მეტი ლიცენზიის გაცემას გრინფილდის დეველოპერებისთვის, რის შემდეგაც მათ უნდა მიიღონ სამთო ნებართვები ადგილობრივი ხელისუფლებისა და მარეგულირებლებისგან.

"უკრაინაში პუტინის უკანონო შეჭრისა და ენერგეტიკის იარაღად ქცევის ფონზე, ჩვენი ენერგეტიკული უსაფრთხოების გაძლიერება აბსოლუტური პრიორიტეტია. ჩვენ დაგვჭირდება ყველა შესაძლო ვარიანტის შესწავლა, ამიტომ სწორია, რომ მოვხსნათ მორატორიუმი საყოფაცხოვრებო გაზის ნებისმიერი პოტენციური რეალიზაციის წყაროზე", - აღნიშნა მთავრობამ.

"მორატორიუმის მოხსნა დაეხმარება ფიქალის ინდუსტრიას გაერთიანებული სამეფოს ბუნებრივი აირის განბლოკვაში იმ რაოდენობით, რომელიც საკმარისი იქნება გაერთიანებული სამეფოს მოთხოვნილებების დასაკმაყოფილებლად მომდევნო ათწლეულებში", - მთავრობის გადაწყვეტილებას კომპანია Cuadrilla მიესალმა, რომელიც წარმოების უდიდეს მარაგებს ფლობს ქვეყანაში.

ჰიდრავლიკური მოტეხილობით გაზის წარმოება 2019 წლიდან აკრძალულია

მიწისძვრის საფრთხის გამო დიდ ბრიტანეთში 2019 წლიდან აიკრძალა ჰიდრავლიკური მოტეხილობა გაზის წარმოებისთვის. ასევე გარემოსდაცვითი აქტივისტები ეწინააღმდეგებიან ფრეკინგს, მათ შორის ტოქსიკური ქიმიური ნაერთებით წყლის დაბინძურების შესაძლებლობის გამო.

Reuters-ის მიერ გამოკითხული ექსპერტები ეჭვობენ, რომ მორატორიუმის გაუქმება ხელს შეუწყობს ენერგიის ფასების შემცირებას ამ ზამთარში, რადგან ინდუსტრიის განვითარებას მრავალი წელი დასჭირდება.

"მაშინაც კი, თუ რისკები მართვადი და მისაღები აღმოჩნდება, გაერთიანებული სამეფოს მომარაგებაზე ფიქალის გაზი დიდ გავლენას მხოლოდ იმ შემთხვევაში მოახდენს, თუ ათასობით წარმატებული ჭაბურღილი გაიბურღდება მომდევნო ათწლეულის განმავლობაში", - განუცხადა სააგენტოს დურჰემის უნივერსიტეტის პროფესორმა ენდრიუ აპლინმა.