ახალი ამბები

ვლადიმირ პუტინისა და დონალდ ტრამპის დაგეგმილი შეხვედრა მოსკოვის უკომპრომისო პოზიციის გამო გადაიდო. 

ვითარების არსი: ინფორმაციას ამის შესახებ საინფორმაციო სააგენტო Reuters ავრცელებს. 

• "მოსკოვის პოზიციამ - ცეცხლის დაუყოვნებლივ შეწყვეტის წინააღმდეგ - საფრთხე შეუქმნა ბუდაპეშტში პრეზიდენტების დაგეგმილ შეხვედრას"- ნათქვამია მასალაში. 
  
  
• გამოცემის წყაროს ინფორმაციით, თავის მხრივ სახელმწიფო მდივან მარკო რუბიოსა და რუსეთის საგარეო საქმეთა მინისტრის შეხვედრის თარიღის გადატანა იმაზე მოწმობს, რომ კრემლის უკომპრომისო პოზიციის შენარჩუნების შემთხვევაში სამიტი საერთოდაც არ ჩატარდება. 
  
  
• "ვფიქრობ რუსებმა ზედმეტი მოინდომეს და ამერიკელებმა მკაფიოდ დაინახეს, რომ ბუდაპეშტში შეთანხმება ვერ მოხდება"- ამბობს წყარო. 

ჩაშლილად: მოგვიანებით შეხვედრის გადატანის შესახებ გავრცელებული ცნობები დაადასტურეს თეთრ სახლში და განაცხადეს, რომ პრეზიდენტი ტრამპი უახლოეს მომავალში არ გეგმავს შეხვედრას ვლადიმირ პუტინთან. 

• განცხადებაში ამის მიზეზად რუბიოსა და ლავროვის "პროდუქტიულ" სატელეფონო საუბარს ასახელებენ, რომლის შემდეგაც "პრეზიდენტების პირადი კონტაქტის აუცილებლობა არ არსებობს."
  
  
• გაურკვეველი ვადით გადაიდო სერგეი ლავროვისა და მარკო რუბიოს შეხვედრაც, რომელიც დასავლური მედიის ცნობით 23 ოქტომბერს უნდა შემდგარიყო და პრეზიხენტების სამიტის მოსამზადებლად იყო საჭირო. 
  
  

დიდი სურათი: 17 ოქტომბერს ვოლოდიმირ ზელენსკისთან გამართული შეხვედრის შემდეგ დონალდ ტრამპი დაუყოვნებლივი ზავის და კონფლიქტის ფრონტის არსებულ ხაზებზე გაყინვის იდეას დაუბრუნდა. 

• Washington Post-ის ინფორმაციით, წინა დღით ტრამპთან გამართულ სატელეფონო საუბარში ზავის სანაცვლოდ პუტინმა დონეცკის არაოკუპირებული ნაწილიდან უკრაინული არმიის გაყვანა მოითხოვა. 
  
  
• 21 ოქტომბერს გამართულ ბრიფინგზე სერგეი ლავროვმა განაცხადა, რომ დაუყოვნებლივი ზავი რუსეთისთვის მიუღებელია, რადგანაც კვლავ მოუგვარებელი დარჩენა კონფლიქტის პირველადი მიზეზები. 
  
  

კონტექსტი: თავის მხრივ ბუდაპეშტში შეხვედრის შესახებ ლიდერები 16 ოქტომბერს გამართული რიგით მერვე სატელეფონო საუბრისას შეთანხმდნენ - ამერიკელი პრეზიდენტი ამბობდა, რომ სამიტი უახლოეს 2 კვირაში შედგებოდა. 

• შეხვედრის მოსამზადებელი სამუშაოების დაწყების შესახებ განაცხადა 17 ოქტომბერს კრემლის პრეს-სპიკერმა, დმიტრი პესკოვმა. 
  
  
• მეტიც, მომდევნო დღეებში ვლადიმირ პუტინი ამ საკითხზე უნგრეთის პრემიერს, ვიქტორ ორბანსაც ესაუბრა. 
  
  

სიღრმისეულად: ალასკაში გამართულ შეხვედრაზე ტრამპი პუტინის ისტორიულმა ლექციამ გააღიზიანა