ახალი ამბები

კიევში დაიწყო საფრანგეთის, გაერთიანებული სამეფოსა და უკრაინის წარმომადგენლების სამმხრივი შეხვედრა ქვეყანაში სამშვიდობო სამხედრო კონტინგენტის განლაგების შესახებ. 

State Of Play: ინფორმაციას ამის შესახებ უკრაინული საინფორმაციო სააგენტო სუსპილნე ავრცელებს. 

• წყაროს ცნობით, შეხვედრა სამხედრო შტაბების მეთაურების დონეზე მიმდინარეობს. ფრანგულ დელეგაციას შეიარაღებული ძალების მთავარი სამხედრო შტაბის უფროსი, გენერალი ტიერი ბურკჰარდტი ხელმძღვანელობს, ხოლო ბრიტანულს თავდაცვის შტაბის უფროსი, ადმირალი ენტონი რადაკინი. 
  
  
• გამოცემის ინფორმაციით, უკრაინელ კოლეგებთან შეხვედრის გარდა დაგეგმილია ევროპელი ოფიცრების შეხვედრა პრეზიდენტ ზელენსკისთანაც. 

Big Picture: მსურველთა კოალიციის წარმომადგენლების შეხვედრა ვოლოდიმირ ზელენსკიმ გასულ მარტში დააანონსა - უკრაინელი პრეზიდენტის თქმით, ეს უნდა ყოფილიყო პირველი ღრმა და საგნობრივი შეხვედრა, რომელზეც განხილული იქნებოდა სახმელეთო, საავიაციო და საზღვაო დანაყოფების განთავსების საკითხი. 

• ჩრდილო-ატლანტიკურ ალიანსში გაწევრიანების შემდეგ კიევში უსაფრთხოების საუკეთესო გარანტიად ცეცხლის შეწყვეტის შემდეგ ქვეყანაში ევროპული ბრძოლისუნარიანი დანაყოფების განლაგებას მიიჩნევენ. 
  
  
• დასავლური მედიის ცნობით, ე.წ. მსურველთა კოალიციის სამუშაო პროცესში ამ დროისთვის დაახლოებით 30 ქვეყანა მონაწილეობს, თუმცა ჯერჯერობით უცნობია იმ ქვეყნების რაოდენობა, რომლებსაც უკვე მიღებული აქვთ შესაბამისი გადაწყვეტილება. 
  
  
• უკრაინის პრეზიდენტის ოფისის უფროსის მოადგილისა და ვოლოდიმირ ზელენსკის სამხედრო მრჩეველის, პავლო პალისას ცნობით, საუბარია დაახლოებით 10-12 ქვეყანაზე. 
  
  

Context: 3 აპრილს Financial Times საკუთარ წყაროებზე დაყრდნობით წერდა, რომ ევროპული ქვეყნები სამშვიდობო კონტინგენტის საქმიანობაში ნატოს ერთობლივი სტრუქტურების ჩართვის გეგმას განიხილავენ.

• ამჟამად საფრანგეთი და დიდი ბრიტანეთი განიხილავენ ნატოს სამეთაურო შტაბების სტრუქტურების ჩართვას და ასევე ალიანსის ერთობლივი სადაზვერვო სამსახურების რესურსის გამოყენებას - წყაროების ცნობით, საბოლოო გადაწყვეტილება მიღებული ჯერ არ არის. 
  
  
• სამშვიდობო კონტინგენტის განთავსებაში ლოჯისტიკური და უშუალო დახმარების გარდა ნატოს სტრუქტურების ჩართვას "მსურველთა კოალიციაში" განიხილავენ როგორც მისიაში ამერიკის შეერთებული შტატების ირიბ მონაწილეობას, რაც თავის მხრივ თავდაჯერებულობას შემატებს ქვეყნებს, რომლებსაც ამ დრომდე არ მიუღიათ საბოლოო გადაწყვეტილება. 
  
  
• დონალდ ტრამპმა რამდენიმეჯერ განაცხადა, რომ მხარს უჭერს უკრაინაში ევროპული ჯარების განლაგების იდეას, თუმცა გამორიცხა აშშ-ს პირდაპირი მონაწილეობა.