ახალი ამბები

ჩინეთის შეიარაღებული ძალებმა ტაივანის საჰაერო და საზღვაო სივრცესთან ახლოს საბრძოლო მზადყოფნის წვრთნები ჩაატარეს.

სამხედრო სწავლება კუნძულზე გავლენიანი რესპუბლიკელი სენატორის, რიკ სკოტის ვიზიტს დაემთხვა, რომელიც ტაივანის პრეზიდენტ ცაი ინგ-ვენს შეხვდა.

წვრთნები, რომლებსაც ჩინეთის სახალხო განმათავისუფლებელი არმიის აღმოსავლეთ სარდლობა ხელმძღვანელობდა, აშშ-ს და ტაივანის „პროვოკაციული“ ნაბიჯების საპასუხოდ ჩატარდა, - განაცხადა ჩინეთის თავდაცვის სამინისტროს პრეს-სპიკერმა.

გუშინ რამდენიმე ჩინურმა გამანადგურებელმა ტაივანის სრუტე ჩრდილოეთის ნაწილში გადაკვეთა, თუმცა კუნძულის საჰაერო ზონაში არ შესულან, წერს სააგენტო Reuters-ი.

„ჩინეთის არმია ომისთვის მუდმივ მზადყოფნაშია და გარე ძალების ჩარევის და ტაივანის სეპარატისტული მცდელობების შემთხვევაში ყველა საჭირო ზომას მიიღებს“, - განაცხადეს ჩინეთის თავდაცვის უწყებაში.

ამერიკელმა სენატორმა ჩინეთის „გამომწვევი“ ქმედება დაგმო და განაცხადა, რომ ტაივანის წყნარი ოკეანის სამხედრო სწავლებებში ჩართვას უჭერს მხარს.

RIMPAC-ის სახელით ცნობილი წვრთნები მსოფლიოში ყველაზე მასშტაბურ საზღვაო სწავლებას წარმოადგენს, რომელშიც აშშ და 25 მოკავშირე ქვეყანა მონაწილეობენ.

ჩინეთი ტაივანს საკუთარ ტერიტორიას მიიჩნევს და კუნძულზე „სამხედრო გზით“ კონტროლის დამყარებაზე საუბრობს.