ახალი ამბები

ოთხშაბათს გამოქვეყნებული საზოგადოებრივი აზრის კვლევის თანახმად, პრეზიდენტი ტრამპის მოწონების რეიტინგი, მისი მეორე ვადის განმავლობაში რეკორდულად დაბალია. ამის მიზეზი ეკონომიკური არასტაბილურობა და ჰუსიტების დაბომბვის Signal-ზე განხილვის სკანდალია.

State Of Play: Reuters/Ipsos-ის ახალმა გამოკითხვამ აჩვენა, რომ პრეზიდენტის მოწონების რეიტინგი 43% იყო, რაც მარტის ბოლოს ჩატარებულ კვლევაზე 2%-ით ნაკლებია. მას შემდეგ, რაც ტრამპი 20 იანვარს პრეზიდენტად დაბრუნდა, მისი მოწონების რეიტინგი 47%-ს შეადგენდა.

• ბოლო კვლევაში, გამოკითხულთა 37%-ს აკმაყოფილებდა ტრამპის მიერ ეკონომიკის მართვა, ხოლო 30% იწონებდა მის მიდგომას ფასების ზრდის წინააღმდეგ.
• ამერიკელთა უმრავლესობამ, 52%-მა თქვა, რომ მანქანებსა და ავტონაწილებზე ტარიფების გაზრდა საზიანო იქნება მოქალაქეებისთვის. რესპონდენტთა ანალოგიურმა ნაწილმა თქვა, რომ ტარიფების ზრდა ყველა საქონელზე, გააუარესებს სიტუაციას.
• კვლევის თანახმად, რესპუბლიკელი და რესპუბლიკელების მიმართ სიმპათიებით განწყობილი ამომრჩევლების დაახლოებით მესამედმა განაცხადა, რომ ტარიფები ზიანს აყენებს ეკონომიკას.
• კვლევის რესპონდენტებმა ასევე ტრამპი გააკრიტიკეს Signal-ის ჩატის გაჟონვის გამო, რომელშიც მისი ადმინისტრაციის მაღალჩინოსნები იყვნენ. The Atlantic-ის მთავარმა რედაქტორმა გასულ კვირას გამოქვეყნებულ სტატიაში დაწერა, რომ ის Signal-ის ჯგუფში დაამატეს, რომელშიც იემენელი ჰუსიტების დაბომბვის გეგმებს განიხილავდნენ. მიმოწერისას საიდუმლო ინფორმაციაც გაზიარდა.
• გამოკითხულთა დიდმა უმრავლესობამ, 74%-მა, მათ შორის დემოკრატების 91%-მა და რესპუბლიკელების 55%-მა განაცხადა, რომ ომის გეგმების ამგვარად განხილვა "უგუნურებაა."
• მოქალაქეების მხოლოდ მესამედზე მეტმა, 34%-მა მოიწონა ტრამპის საგარეო პოლიტიკა, რაც წინა კვლევაზე 3%-ით ნაკლებია. თითქმის ნახევარი, 48% კმაყოფილი იყო პრეზიდენტის მიგრაციული პოლიტიკით.

Big Picture: პრეზიდენტმა ტრამპმა ოთხშაბათს 10%-იანი საბაზისო ტარიფი დააწესა აშშ-ში იმპორტირებულ საქონელზე, მაგრამ ბევრ ქვეყანას ბევრად უფრო მაღალი ტარიფები დაუწესა, მათ შორის არის ჩინეთი, ვიეტნამი, იაპონია, ინდოეთი, სამხრეთ კორეა, ტაილანდი, შვეიცარია, ინდონეზია, მალაიზია, კამბოჯა და ევროკავშირი.

• ჩინეთისთვის დაწესებული ტარიფი ყველაზე მაღალია: პრეზიდენტმა ოთხშაბათს 34%-იანი ტარიფი გამოაცხადა, რომელიც ადრე დაწესებულ 20%-ს დაემატება და ჯამში გადასახადის მთლიანი მოცულობა 54%-ია.
• სხვა ქვეყნები, რომლებსაც მაღალი ტარიფები დაუწესდათ არის ვიეტნამი (46%), ტაივანი (32%), ინდონეზია (32%) და კამბოჯა (49%).
• აშშ-ის პრეზიდენტმა ამ გადაწყვეტილებას "ისტორიული ბრძანება" უწოდა: "ჩემი აზრით, ეს არის ერთ-ერთი ყველაზე მნიშვნელოვანი დღე ამერიკის ისტორიაში."
• მან ასევე დაადასტურა, რომ ის 25%-იან ტარიფს დააწესებს შეერთებულ შტატებში ყველა ავტომობილის იმპორტზე.
• ტრამპის მიერ საქართველოსთვის დაწესებული ტარიფი 10%-ია. 2024 წელს საქართველოდან აშშ-ში ექსპორტის მოცულობა 141 მილიონი აშშ დოლარი იყო, ყველაზე დიდი საექსპორტო პროდუქტი კი  ფეროშენადნობები - 90 მილიონი დოლარი.

Context: Reuters/Ipsos-ის კვლევა 31 მარტიდან 2 აპრილამდე, 1486 ამერიკელს შორის ჩატარდა. ცდომილების ზღვარი დაახლოებით 3% იყო.