ახალი ამბები

რესპუბლიკელმა სენატორმა მარშა ბლექბერნმა ტაივანის პრეზიდენტთან შეხვედრისას კუნძული „ქვეყანად“ მოიხსენია.

„ტაივანელების და მათი დემოკრატიის და თავისუფლების მხარდაჭერას გავაგრძელებ. სი ძინფინგი ვერ შემაშინებს“, - განაცხადა სენატორმა ტენესის შტატიდან.

აშშ ტაივანს ჩინეთის სახალხო რესპუბლიკის ნაწილად მიიჩნევს, თუმცა კუნძულის თვითმმართველობის მხარდამჭერია.

• რა ხდება ტაივანსა და ჩინეთს შორის - მოკლედ

ჯო ბაიდენის განცხადებით, თუ ჩინეთი ტაივანის სტატუს-კვოს შეცვლას შეეცდება, ამერიკა ტაიპეის სამხედრო დახმარებას გაუწევს.

სენატორთან შეხვედრისას პრეზიდენტმა ცაი ინგ-ვენმა აღნიშნა, რომ ბოლო ხანებში კუნძულს ბევრი ამერიკელი მაღალჩინოსანი ეწვია.

„მხარდაჭერის ეს თბილი და მტკიცე ჟესტები ტაივანელებს თავდაცვის სულისკვეთებას სულ უფრო გვიძლიერებს“, - განაცხადა ცაი ინგ-ვენმა.

აგვისტოს დასაწყისში აშშ-ს წარმომადგენელთა პალატის სპიკერის ტაივანში ჩასვლას პეკინისგან მწვავე რეაქცია მოჰყვა.

ჩინეთმა ტაივანის სრუტეში მასშტაბური წვრთნები ჩაატარა. ანალიტიკოსები ფიქრობენ, რომ სამხედრო ესკალაცია პერმამენტულ სახეს მიიღებს.