დენაციფიკაცია და დემილიტარიზაცია - რუსეთმა დარეგულირების "პირობები" წარადგინა
სერგეი ლავროვმა უკრაინასთან კონფლიქტის მშვიდობიანი დარეგულირებისთვის კრემლის "პირობები" საჯაროდ გამოაცხადა - სრულმასშტაბიანი შეჭრის დაწყების შემდეგ რუსეთის მოთხოვნები არ შეცვლილა, საუბარია "უკრაინის დენაციფიკაციასა და დემილიტარიზაციაზე."
State Of Play: ამის შესახებ რუსეთის საგარეო საქმეთა მინისტრმა ბრაზილიურ გამოცემა O Globo-სთვის მიცემულ ინტერვიუში ისაუბრა, რომლის თარგმანიც МИД-ის საიტზე გამოქვეყნდა. ლავროვის მიერ წარდგენილი მოთხოვნები სულ ცოტა რამდენიმე პუნტქში წინააღმდეგობაში მოდის ტრამპის ადმინისტრაციის მიერ მომზადებულ სამშვიდობო გეგმასთან.
- ჟურნალისტის მიერ დასმულ კითხვაზე, თუ რა პირობებზე იქნება რუსეთი თანახმა დაიწყოს მშვიდობიანი მოლაპარაკებები ლავროვი პასუხობს, რომ "რუსეთის პოზიცია ამ საკითხზე კარგადაა ნაცნობი."
- 27 აპრილს ტელეარხ ABC-ისთვის მიცემულ ინტერვიუში ლავროვმა უარყო, რომ ამერიკელ კოლეგებთან ზაპორიჟიის ატომური ელექტროსადგურის საკითხი განიხილებოდა, რაც დასავლური მედიების ცნობით, ტრამპის გუნდის მიერ შემუშავებული სამშვიდობო გეგმის ერთ-ერთი პუნქტია.
- ტრამპის მიერ ინიცირებული სამშვიდობო პროცესის შემდეგ გასული 2 დღის განმავლობაში რუსეთის წარმომადგენლებმა პირველად გააჟღერეს მკაფიოდ ფორმულირებული მოთხოვნები
რუსეთის მოთხოვნები:
- უკრაინის უბლოკო და ნეიტრალური სტატუსი, უარი ნატოში გაწევრიანებაზე;
- ყირიმის, ხერსონის, ზაპორიჟიის, დონეცკისა და ლუჰანსკის ოლქების რუსეთის ტერიტორიებად საერთაშორისო აღიარება - ამ პუნტქს ლავროვმა იმპერატივი უწოდოა;
- უკრაინის დემილიტარიზაცია და დენაციფიკაცია;
- სანქციების გაუქმება და რუსეთის ცენტრალური ბანკის გაყინული აქტივების დაბრუნება;
Big Picture: ლავროვის მიერ გაჟღერებული მოთხოვნები როგორც მინიმუმ რამდენიმე პუნქტში არსებითად ეწინააღმდეგება ტრამპის ადმინისტრაციის მიერ მომზადებულ სამშვიდობო გეგმას, რომელიც გასულ კვირას სტივენ უიტკოფმა ვლადიმირ პუტინს წარუდგინა.
- ამერიკულ გეგმაში საუბარია ყირიმის ანექსიის აღიარებაზე აშშ-ს მხრიდან, ხოლო დანარჩენი ოკუპირებული ტერიტორიების დე-ფაქტო აღიარებაზე.
- წინააღმდეგობის კიდევ ერთი საკითხი ლავროვის მიერ გაჟღერებული უკრაინის დემილიტარიზაციაა, რომელზეც ამერიკელების მიერ მომზადებულ გეგმაში არაფერია ნათქვამი.
- უკრაინის დემილიტარიზაციაზე, ანუ არმიის ზომის შეზღუდვაზე საუბარი 2022 წლის გაზაფხულზე თურქეთის მედიაციით გამართული სამშვიდობო პროცესისას მიმდინარეობდა - პუტინი ამბობდა, რომ რუსეთი მზად იყო უკრაინასთან სამშვიდობო შეთანხმებისთვის სტამბოლში შეთანხმებულ პარამეტრებზე დაყრდნობით.
- მიუხედავად ამისა, ტრამპის გუნდის მიერ მომზადებულ გეგმა არ ითვალისწინებს მსგავს ზომებს, მეტიც ვაშინგტონში ამბობენ, რომ უკრაინას როგორც სუვერენულ სახელმწიფოს უფლება აქვს ჰყავდეს ძლიერი არმია და თავდაცვის სექტორი.
- ტრამპის გეგმა არ ითვალისწინებს უკრაინაში უცხოური სამხედრო კონტინგენტების აკრძალვს, რასაც ამ დროისთვის ევროპული ქვეყნები განიხილავენ და რასაც კატეგორიულად ეწინააღმდეგება რუსეთი.
- გარდა ამისა, ტრამპის მიერ გეგმაში არაფერია ნათქვამი უკრაინის დენაციფიკაციაზე, რომელიც ლავროვის თქმით, 2014 წლის შემდეგ მიღებული რიგი კანონების გაუქმებით იქნება გამოხატული.
Context: გასულ დღეებში თეთრ სახლსა და კრემლს შორის უთანხმოებები უფრო მკაფიო გახდა. მხოლოდ გასული 4 დღის განმავლობაში დონალდ ტრამპმა ვლადიმირ პუტინის მიმართ 3 კრიტიკული განცხადება გაავრცელა, რომლებშიც ასევე საუბარი იყო სანქციების გამკაცრებაზე.
- გაზრდილი უთანხმოებების ფონზე, სახელმწიფო მდივანმა მარკო რუბიომ კიდევ ერთხელ განაცხადა, რომ შესაძლებლობების ფანჯარა ღია დიდი ხნით არ დარჩება და პროგრესის არ არსებობის შემთხვევაში მომდევნო კვირიდან ვაშინგტონი გავა მედიაციის პროცესიდან.
