ახალი ამბები

ჩეჩნეთის ხელმძღვანელმა რამზან კადიროვმა განაცხადა, რომ მზადაა, "ვაგნერის" დაქირავებული მებრძოლები, რომლებსაც სავარაუდოდ ბახმუტის დატოვება სურთ, ჩეჩნებით ჩაანაცვლოს. ამის შესახებ კადიროვმა Telegram-ზე დაწერა.

ბახმუტი ფრონტის ყველაზე ცხელი წერტილია, სადაც ასობით ბოევიკი იღუპება. "ვაგნერის" ლიდერმა ევგენი პრიგოჟინმა გამოაქვეყნა მიმართვა, სადაც დაღუპული ოკუპანტების სხეულები ჩანს და რუსეთის თავდაცვის სამინისტრო საბრძოლო მასალის ნაკლებობაში დაადანაშაულა.

"თუ უფროსი ძმა პრიგოჟინი და ვაგნერი დატოვებენ (ბახმუტს - რედ.), მაშინ გენერალური შტაბი დაკარგავს გამოცდილ საბრძოლო ნაწილს, ხოლო უმცროსი ძმა კადიროვი და "ახმატი" დაიკავებენ მის ადგილს ბახმუტში. თუ სცენარი მაინც ასეთია, მაშინ ჩვენი მებრძოლები მზად არიან წინ წავიდნენ და ქალაქი დაიკავონ. ეს საათების საქმეა." - თქვა ჩეჩნეთის ლიდერმა.

კადიროვმა ევგენი პრიგოჟინს, რუსეთის თავდაცვის მინისტრს სერგეი შოიგუს და რუსეთის შეიარაღებული ძალების გენერალური შტაბის უფროსს ვალერი გერასიმოვს მიმართა და მათ შერიგებისკენ მოუწოდა.

მისი თქმით, ასეთი სახალხო დაპირისპირება რუსი ოკუპანტებისა და საზოგადოების დემოტივირებას იწვევს.

მან განაცხადა, რომ "უსიამოვნოა პრიგოჟინის განცხადებების მოსმენა" და "ორმაგად უსიამოვნოა, რომ რუსეთის თავდაცვის სამინისტროს ხელმძღვანელობა არ აკეთებს კომენტარს ან არ ხვდება "ვაგნერის" ხელმძღვანელობას."

კადიროვმა ასევე განაცხადა, რომ მარიუპოლის ბლოკადის დროს კადიროველებმა რუსეთის თავდაცვის სამინისტროს 5 ტანკი სთხოვეს, მაგრამ მხოლოდ ერთი მიიღეს.

მან ასევე დაიწყო ჩივილი რუსული ტექნოლოგიების მდგომარეობაზე და გააკრიტიკა პრიგოჟინი, რომელმაც აჩვენა დაღუპული დაქირავებულების ცხედრები.

"საზოგადოებრივი აღშფოთების გამოწვევის მიზნით გარდაცვლილი ამხანაგების ცხედრების ჩვენება არასწორია. არასოდეს გავაკეთოთ ეს." - თქვა კადიროვმა.

მან ასევე პრიგოჟინი გააკრიტიკა და თქვა, რომ ფრონტზე კადიროველების პასუხისმგებლობის არეალში პრობლემები ყოველდღიურად ჩნდება, მაგრამ მისმა მეთაურებმა ეს ერთხელაც არ თქვეს "ინტერნეტის საშუალებით საჯაროდ, მხოლოდ ხელმძღვანელობასთან შიდა კომუნიკაციით."

მისი თქმით, რუსეთის ფედერაციის თავდაცვის სამინისტრო და გენერალური შტაბი ყოველთვის მიდიოდნენ მის ქვედანაყოფებთან და ეხმარებოდნენ.