ახალი ამბები

რუსულმა სამთავრობო მედიამ რუსეთის პრეზიდენტის ადმინისტრაციისგან მოთხოვნა მიიღო, რაც შეიძლება ნაკლებად გააშუქოს ჭორები მობილიზაციის მეორე ტალღის შესახებ და ასევე არ გამოაქვეყნოს ამ "ჭორების" ოფიციალური უარყოფა.

ამის შესახებ Meduza რუსეთის პრეზიდენტის ადმინისტრაციაში წყაროზე დაყრდნობით წერს.

ერთ-ერთი სამთავრობო ტაბლოიდის თანამშრომელმა გამოცემას განუმარტა, რომ მობილიზებასთან დაკავშირებით დიდი რაოდენობით კომენტარებს ნახულობს და ბევრი ადამიანი მათგან იღებს ამ ინფორმაციას.

"და როგორც ჩვენ (რუსეთში) გვჯერა, თუ ხელისუფლება რაიმეს უარყოფს, ეს აუცილებლად მოხდება," - აღნიშნა წყარომ.

გამოცემის თანამოსაუბრეებმა აღნიშნეს, რომ პრეზიდენტის ადმინისტრაციის მოთხოვნა, მაგალითად, ეხება სახელმწიფო სათათბიროს თავდაცვის კომიტეტის თავმჯდომარის ანდრეი კარტაპოლოვის განცხადებებს, კერძოდ, მობილიზაციის ახალი ტალღის შესახებ ინფორმაციის "უარყოფას."

ეს დეპუტატი ცნობილი გასული წლის სექტემბერში გახდა, როდესაც მობილიზაციისთვის მზადება მის დაწყებამდე "უარყო."

შესაძლო მობილიზაციის შესახებ კომენტარების შესახებ ახალი ამბების ნაცვლად, კრემლმა პროპაგანდისტებს შესთავაზა ყურადღება გაამახვილონ პუბლიკაციებზე საკონტრაქტო ჯარის დაკომპლექტების შესახებ, რაც, "ძალიან წარმატებით" მიმდინარეობს.

რუსეთის ფედერაციის პრეზიდენტის ადმინისტრაციასთან დაახლოებულმა წყარომ, თავის მხრივ, ეს რეკომენდაცია იმით ახსნა, რომ მობილიზაციის ხსენება ძალიან აწუხებს საზოგადოებას: "ამ თემაზე საუბარი ნაკლებად შეიძლება. ნაკლები ტრიგერებია."

გავრცელებული ინფორმაციით, 2024 წლის საპრეზიდენტო არჩევნების წინა პერიოდში კრემლს არ სჭირდება ასეთი "შფოთვა."

"ეს გავლენას ახდენს ადამიანების განწყობაზე, ზოგისთვის შეიძლება გადაიზარდოს საპროტესტო განწყობებში. ისინი მისცემენ ხმას [პუტინის] წინააღმდეგ ან არ წავლენ არჩევნებზე," - ამბობს წყარო.

ამავდროულად, გამოცემის კრემლთან დაახლოებულმა თანამოსაუბრეებმა გააკეთეს დათქმა, რომ მათ არაფერი იციან იმის შესახებ, იქნება თუ არა მობილიზაციის ახალი ტალღა.