სახდეპი რუსეთის მუქარაზე: უკრაინის მხარდაჭერის სტრატეგიას ვერაფერი შეცვლის
აშშ-ს სახელმწიფო დეპარტამენტის პრესპიკერმა, ნედ პრაისმა რუსეთის მიერ გაგზავნილ დიპლომატიურ ნოტაზე ისაუბრა, რომელშიც რუსეთი აშშ-ს არაპროგნოზირებადი შედეგებით დაემუქრა, თუ ის არ შეწყვეტდა უკრაინის შეიარაღებას.
"რუსებმა ამ საკითხზე ისაუბრეს დიპლომატიური გზით და საჯაროდაც, მაგრამ ვერაფერი შეცვლის ჩვენ სტრატეგიას, რომელიც უკრაინასთან მიმართებით გვაქვს",- განაცხადა პრაისმა.
ამავდროულად პრაისს ოფიციალურად არ დაუდასტურებია, რუსეთისგან შესაბამისი შინაარსის დიპლომატიური ნოტის მიღების ამბავი.
რუსეთის მუქარის ფონზე, პარალელურად ვრცელდება ინფორმაცია, რომ უკრაინისთვის განკუთვნილი ახალი სამხედრო დახმარების პაკეტის პირველი ნაწილს უკრაინას უახლოეს 24 საათში მიაწვდიან.
პენტაგონის წარმომადგენელმა CNN-თან საუბარში განაცხადა, მისი მტკიცებით შეიარაღებას უკრაინის საზღვარზე ჩაიტანენ, სადაც მას უკრაინის შეიარაღებული ძალების წარმომადგენლები დახვდებიან
ომის დაწყების პირველივე დღეებიდან რუსეთის სახელმწიფო თანამდებობის სხვადასხვა დონის პირები ამბობდნენ, რომ უკრაინისთვის მისაწოდებელი შეიარაღების კოლონები რუსეთისთვის ლეგიტიმურ სამიზნედ იქნებოდა მიჩნეული.
მათ შორის ამის შესახებ განაცხადა რუსეთის საგარეო საქმეთა მინისტრის მოადგილემ, სერგეი რიაბკოვმა და მინისტრმა, სერგეი ლავროვმაც.
.jpg)
