თალიბანი ქალებს არასამთავრობო ორგანიზაციებში მუშაობას უკრძალავს

ავღანეთის მმართველმა ისლამისტურმა ორგანიზაცია თალიბანმა ადგილობრივ და უცხოურ არასამთავრობო ორგანიზაციებს ქალების დასაქმება აუკრძალა. ამ ინფორმაციას Reuters ქვეყნის ეკონომიკის სამინისტროს წერილობით განცხადებაზე დაყრდნობით ავრცელებს.

სამინისტროს წერილში ნათქვამია, რომ აკრძალვა აიხსნება "ბევრი საჩივრით", რომ ზოგიერთი ქალი არ იცავდა თალიბანის მიერ დადგენილ ისლამურ ჩაცმის წესებს.

თალიბანი აცხადებს, რომ ნებისმიერ არასამთავრობო ორგანიზაციას, რომელიც არ ასრულებს კანონს, გაუქმდება ავღანეთში საქმიანობის ლიცენზია. ქვეყნის ეკონომიკის სამინისტროს წარმომადგენლის თქმით, აკრძალვა ეხება 180-ზე მეტ ორგანიზაციას.

როგორც Reuters-მა აღნიშნა, გაეროს ჰუმანიტარული მისიები ხშირად მუშაობენ ავღანეთში ადგილობრივი ორგანიზაციების მეშვეობით, რომლებზეც აკრძალვა გავრცელდება.

"ქალებისთვის არასამთავრობო ორგანიზაციებში მუშაობის აკრძალვა დაუყოვნებლივ უნდა მოიხსნას. ეს ნაბიჯი არა მხოლოდ დააზარალებს ქალთა უფლებებს, არამედ გაამწვავებს ჰუმანიტარულ კრიზისს და დააზარალებს ყველაზე დაუცველ ავღანელებს", - წერს ავღანეთში ნორვეგიის საქმეთა დროებითი რწმუნებული, პოლ კალუმალი, რომელიც ქვეყნის მოსახლეობის ფინანსურ დახმარებაშია ჩართული და ადრეც მონაწილეობდა თალიბანთან მოლაპარაკებებში.

გაეროს მისიის ხელმძღვანელმა ავღანეთში და ჰუმანიტარული დახმარების კოორდინატორმა რამიზ ალაკბაროვმა თალიბანის გადაწყვეტილებას "ჰუმანიტარული პრინციპების აშკარა დარღვევა" უწოდა, რაც "ღრმა შეშფოთებას" იწვევს.  

მანამდე ცნობილი გახდა, რომ თალიბებმა ქალებს უნივერსიტეტებში სწავლა აუკრძალეს. მოძრაობამ ეს გადაწყვეტილება "ეროვნული ინტერესების დაცვით" და სასწავლო პროგრამის ისლამური ნორმების შესაბამისად შეცვლის აუცილებლობით ახსნა.

მსგავსი სიახლეები