ახალი ამბები

შეერთებული შტატების თავდაცვის უწყების ცნობით, უკრაინისთვის შეიარაღების მიწოდების პროცესი აღდგენილია, დაკონკრეტებულია, რომ საუბარია თავდაცვით შეიარაღებაზე. 

State Of Play: ამის შესახებ უწყების პრესსპიკერის, შონ პარნელის მიერ გავრცელებულ განცხადებაშია საუბარი - პენტაგონის შეტყობინებას წინ უძღოდა პრეზიდენტ ტრამპის კომენტარი, რომ აშშ უკრაინას დამატებით შეიარაღებას გადასცემდა. 

• "პრეზიდენტ ტრამპის განკარგულების შესაბამისად თავდაცვის სამინიტრო უკრაინას დამატებით თავდაცვით შეიარაღებას უგზავნის, რათა მათ შეძლონ თავის დაცვა, სანამ ჩვენ მყარი მშვიდობის მისაღწევად ვმუშაობთ"- ნათქვამია განცხადებაში. 
  
  
• მოკლე ოფიციალურ შეტყობინებაში აღნიშნულია, რომ პარალელურად გრძელდება ამერიკის სამხედრო მარაგების შესწავლის პროცესი და ტრამპის ადმინისტრაციის პოლიტიკის (America Firs) განუყოფელი ნაწილია. 

Big Picture: თეთრ სახლში ისრაელის პრემიერის მიღების დროს, ჟურნალისტებთან საუბრისას დონალდ ტრამპმა განაცხადა, რომ მისი ადმინისტრაცია უკრაინას დამატებით შეიარაღებას გაუგზავნიდა. 

• ჟურნალისტის კითხვაზე აპირებს თუ არა უკრაინისთვის შეიარაღების გაგზავნას ტრამპმა შემდეგნაირად უპასუხა: "დიახ, უკრაინას მეტ შეიარაღებას გადავცემთ, ჩვენ ამის გაკეთება მოგვიწევს, მათ უნდა შეეძლოთ თავის დაცვა. მათ ძალიან მძიმედ უტევენ, ძალიან მძიმედ. საუბარია ძირითადად თავდაცვით შეიარაღებაზე, მაგრამ მათ ძალიან მძიმედ უტევენ." 
  
  
• ამავე პრესკონფერენციაზე დონალდ ტრამპმა ორჯერ გაიმეორა, რომ "იმედგაცრუებულია" ვლადიმირ პუტინის მოქმედებებით, რადგანაც ამ უკანასკნელს "არ სურს ომის დასრულება."
  
  

Break It Down: ჯერჯერობით უცნობია რა შეიარაღებას გულისხმობდა ტრამპი: ბაიდენის ადმინისტრაციის მიერ დამტკიცებულ პაკეტებს, რომელთა მიწოდებაც გასულ კვირას პენტაგონის გადაწყვეტილებით შეჩერდა, თუ შეიარაღების ახალ პაკეტს, რომელთა შეძენის მზაობასაც კიევი უკვე რამდენიმე თვეა გამოთქვამს.

• პენტაგონის მიერ უკრაინისთვის შეიარაღების მიწოდების დაპაუზების ოფიციალურ მიზეზად ამერიკის შემცირებული არსენალები დასახელდა - გადაწყვეტილებას კონგრესსა და სენატში უკრაინის მხარდამჭერების უკმაყოფილება მოჰყვა. 
  
  
• ამერიკული პრესა წერდა, რომ გადაწყვეტილება თავდაცვის მდივანმა, პიტ ჰეგსეთმა და მისმა მოადგილემ, ელბრიდჯ კოლბიმ სახელმწიფო დეპარტამენტთან და კონგრესთან კონსულტაციის გარეშე ერთპიროვნულად მიიღეს. 
  
  
• თავად ტრამპი უარყოფდა პაუზას, თუმცა ამბობდა, რომ მის გუნდს სურდა დარწმუნებულიყო, რომ საჭიროების შემთხვევაში ამერიკას შეიარაღების საკმარისი მარაგი ექნებოდა. 
  
  

Сontext: შეიარაღების მიწოდების კუთხით წარმოქმნილი პრობლემების ფონზე სატელეფონო საუბარი შედგა დონალდ ტრამპსა და ვოლოდიმირ ზელენსკის შორის. წყაროების ცნობით, საუბარი დადებითად წარიმართა და განიხილებოდა უკრაინის საჰაერო თავდაცვის სისტემის გაძლიერება. 

• უკრაინელი პრეზიდენტის თქმით, ტრამპის ინაუგურაციის შემდეგ ეს ამერიკელ პრეზიდენტთან გამართული "საუკეთესო საუბარი" იყო. 
  
  
• ზელენსკისთან გამართულ ზარს წინ უძღოდა სატელეფონო საუბარი ვლადიმირ პუტინთან, რომლის დასრულების შემდეგაც ტრამპმა განაცხადა, რომ "პუტინთან ვერანაირ პროგრესს ვერ მიაღწია და იმედგაცრუებულია."
  

Go Deeper: უშაკოვი: პუტინმა ტრამპს განუცხადა, რომ არ იტყვის უარს თავის მიზნებზე უკრაინაში