ახალი ამბები

იმ შემთხვევისთვის თუ კრემლი გააგრძელებს ომის გაჭიანურებას დონალდ ტრამპის ადმინისტრაციას რუსეთის სანქცირების ახალი პაკეტი აქვს მომზადებული.

ვითარების არსი: ინფორმაციას ამის შესახებ საინფორმაციო სააგენტო Reuters ავრცელებს - წყაროების ცნობით, მოსალონდელია, რომ უახლოეს კვირებში ტრამპი რუსეთის რეაქციას დააკვირდება და ახალ სანქციებს მხოლოდ ამის შემდეგ დააწესებს. 

• ახალი სანქციების პაკეტი რუსეთის საბანკო და სანავთობო სექტორის წინააღმდეგაა მიმართული - წყაროების ცნობით, პაკეტის მიზანია მოშალოს ფინანსური ინფრასტრუქტურა, რომლის მეშვეობითაც რუსეთი ექსპორტირებული ნავთობის საფასურს იღებს. 

ჩაშლილად: რუსეთზე წნეხის მომენტუმი ფართოვდება სენატშიც, სადაც რუსეთის ახალი სანქციების რამდენიმე აქტია დარეგისტრირებული - წყაროების ცნობით, ნაკლებად სავარაუდოა, რომ ეს პაკეტები მიმდინარე თვეში დამტკიცდება, რადგანაც ამისთვის ტრამპის მხარდაჭერა იქნება საჭირო. 

• რუსეთისთვის სასანქციო რეჟიმის გამკაცრებას სთხოვს ტრამპის ადმინისტრაცია ევროპელ მოკავშირეებსაც - მათ შორის ამერიკის მიერ უკვე სანქცირებული როსნეფტისა და ლუკოილის წინააღმდეგ. 
  
  
• გამოცემის წყაროები ამბობენ, რომ ევროპაში რუმინეთსა და ბულგარეთში ლუკოილის ნავთობგადამამუშავებელი ქარხნებისა და მთელ კონტინენტზე გაშლილი ბენზინგასამართი სადგურების ქსელის გათვალისწინებით, ევროკავშირისთვის რთული იქნება იმავე სიმწვავის სანქციების დაწესება. 
  
  

დიდი სურათი: Reuters-ის წყაროების ცნობით, გასულ დღეებში გამართულ დახურულ კომუნიკაციაში ტრამპის ადმინისტრაციამ მხარი დაუჭირა ევროპაში გაყინული რუსული ფინანსური აქტივების გამოყენებას უკრაინის დასახმარებლად. 

• ვაშინგტონში ასევე გამოთქვეს მზაობა ქვეყანაში გაყინული რუსული აქტივების უკრაინის სამხედრო დახმარებისთვის გამოყენების შესახებ. 
  
  

კონტექსტი: რუსეთის 2 უმსხვილესი სანავთობო კომპანიის წინააღმდეგ სანქციები ტრამპმა ბუდაპეშტში პუტინთან დაგეგმილი შეხვედრის გაუქმების შემდეგ გამოაცხადა. 

• ეს დონალდ ტრამპის მიერ მეორე საპრეზიდენტო ვადაში რუსეთის წინააღმდეგ დაწესებული პირველი სანქციებია. 
  
  
• შეხვედრის გადადების მიზეზი რუსეთის მაქსიმალისტური მოთხოვნები გახდა - კრემლი ცეცხლის შეწყვეტის სანაცვლოდ დონეცკიდან უკრაინული ჯარების გაყვანას ითხოვს
  
  

სიღრმისეულად: Bloomberg: რუსეთისთვის სანქციების დაწესებისკენ ტრამპს მარკო რუბიომ უბიძგა