Financial Times-ში ამბობენ, რომ მათი ჟურნალისტი, კრისტინა კრიდლი, TikTok-მა განზრახ ამოიღო მიზანში, რადგან მან ჩინური კომპანიის ლონდონის ოფისში არსებულ დაპირისპირებაზე დაწერა.

"ჟურნალისტების თვალთვალი, მათ სასქმიანობაში ჩარევა ან მათ წყაროებზე ზეწოლა სრულიად მიუღებელია. ფორმალური პასუხამდე ამბავს სრულად გამოვიძებთ", - ნათქვამია ბრიტანული გაზეთის განცხადებაში.

შემთხვევას გამოეხმაურა ამერიკული გამოცემა Forbes-იც. მათი ინფორმაციით, TikTok-ი მათ სამ ჟურნალისტს უთვალთვალებდა, რომლებიც წარსულში BuzzFeed News-ში მუშაობდნენ. ByteDance-ში ამას უარყოფენ.

ამ ყველაფრის ფონზე აშშ-ში TikTok-ის შეზღუდვაზე მუშაობენ. აშშ-ს სენატმა უკვე დაამტკიცა კანონპროექტი, რომელიც ფედერალური მთავრობის თანამშრომლებისთვის სამთავრობო მოწყობილობებზე ტიკტოკის აპლიკაციის გადმოწერას კრძალავს.

"ტიკტოკი ჩინეთის კომუნისტური პარტიის ტროას ცხენია და აშშ-ს უსაფრთხოებისთვის მნიშვნელოვან საფრთხეს წარმოადგენს", - განაცხადა სენატორმა ჯოშ ჰოულიმ, რომელიც ერთხმად დამტკიცებული კანონპროექტის ავტორია.
 
მსგავსი შეზღუდვები უკვე დააწესეს აშშ-ს 19 შტატში.

აშშ-ში აპლიკაციის შეზღუდვა ჯერ კიდევ წინა პრეზიდენტმა, დონალნდ ტრამპმა სცადა, თუმცა მისმა მემკვიდრემ, ჯო ბაიდენმა წინამორბედის ინიციატივა უკუაგდო.