მელონის სურს იტალიაში ატომური ენერგია აღადგინოს
![](https://realpolitika.ge/storage/images/cache/900x440/meloni 11111111111112222333344.png)
ჯორჯა მელონის მთავრობა იტალიაში ატომური ენერგიის აღდგენას ცდილობს, ბოლო ატომური ელექტროსადგურის დახურვიდან 35 წლის შემდეგ.
ამის შესახებ Financial Times იუწყება.
იტალიის გარემოს დაცვისა და ენერგეტიკული უსაფრთხოების მინისტრმა ჟილბერტო პიჩეტო ფრატინიმ Financial Times-ს განუცხადა, რომ რომი გეგმავს შემოიღოს კანონი, რომელიც მცირე მოდულურ ატომურ რეაქტორებში ინვესტირების საშუალებას მისცემს, რომლებიც შეიძლება 10 წლის განმავლობაში ამუშავდეს.
მისი თქმით, ატომურმა ენერგიამ 2050 წლისთვის ქვეყნის მთლიანი ელექტროენერგიის მოხმარების მინიმუმ 11% უნდა შეადგენოს, რადგან იტალია ცდილობს შეამციროს დამოკიდებულება იმპორტირებულ წიაღისეულ საწვავზე.
"სუფთა ენერგიის უწყვეტი მიწოდების გარანტია რომ გვქონდეს, ატომური ენერგიის კვოტა უნდა შემოვიღოთ," - განაცხადა მინისტრმა.
იტალიამ 1960-იან და 70-იან წლებში ოთხი ატომური ელექტროსადგური ააგო და თავისი ბირთვული სიმძლავრის ამბიციურ გაფართოებას გეგმავდა. მაგრამ საბჭოთა კავშირში 1986 წლის ჩერნობილის კატასტროფის შემდეგ, იტალიელებმა ეროვნულ რეფერენდუმზე ხმა მისცეს ახალი რეაქტორების განვითარებისთვის სუბსიდიების შეწყვეტას.
იტალიაში ბოლო ატომური ელექტროსადგური 1990 წელს დაიხურა.
ორი ათწლეულის შემდეგ, პრემიერ-მინისტრმა სილვიო ბერლუსკონიმ სცადა იტალიის ბირთვული პროგრამის განახლება ახალი კანონის მიღებით და ახალი რეაქტორების ასაშენებლად კონტრაქტების შემუშავებით. მაგრამ მისი მცდელობა 2011 წლის რეფერენდუმზე ჩავარდა, რომელშიც ამომრჩეველთა 90%-ზე მეტმა უარი თქვა ამ გეგმაზე.